चीनबरोबर युद्ध झाल्यास भारताच्या बाजूने हा देश खुलेआम रणमैदानात उतरणार; भारताला पाठविले पत्र

नवी दिल्ली, दि. १ (पिंपरी चिंचवड टाइम्स) – भारताचा अत्यंत महत्त्वाचा धोरणात्मक भागीदार देश फ्रान्सने जाहीरपणे भारताला पाठिंबा दिला आहे. चीनसोबत असलेल्या तणावाच्या पार्श्वभूमीवर भारताला फ्रान्सच्या रुपाने पहिल्यांदाच एखाद्या देशाकडून सैन्यबळाचा पाठिंबा मिळाला आहे. फ्रान्सच्या संरक्षण मंत्री फ्लोरेन्स पार्ली यांनी संरक्षण मंत्री राजनाथ सिंह यांना पत्र लिहून गलवान खोऱ्यात शहीद झालेल्या जवानांबद्दल दुःख व्यक्त केलं आणि आपण लवकरच भारत दौऱ्यावर येणार असल्याचं सांगितलं.

गलवान खोऱ्यातील हल्ला हा सैनिक, त्यांचे कुटुंबीय आणि संपूर्ण देशासाठी मोठा धक्का होता. या कठीण काळात आमच्या सहवेदना भारतासोबत आहेत. मित्र म्हणून भारतासाठी सैन्यबळासह सर्व प्रकारचं सहकार्य फ्रान्सकडून केलं जाईल. माझ्या सहवेदना संपूर्ण भारतीय सैन्याला आणि शहीद सैनिकांच्या कुटुंबीयांना कळवाव्या, असं फ्लोरेन्स पार्ली म्हणाल्या.

फ्रान्सकडून भारत राफेलसारखी शक्तीशाली लढाऊ विमाने घेत आहे. यासोबतच फ्रान्स भारताचा एक महत्त्वाचा शस्त्र पुरवठादार देश आहे. राफेलपासून ते स्कोर्पिन सबमरिनपर्यंतचा ताफा फ्रान्सने पुरवला आहे. फ्रान्सकडून आता भारत दौऱ्याचंही नियोजन करण्यात आलं आहे. करोना संकटानंतर दोन्ही देशांच्या संरक्षण मंत्र्यांमध्ये ही पहिलीच प्रस्तावित भेट आहे. संरक्षण मंत्री राजनाथ सिंह गेल्या महिन्यातच रशियाला गेले होते आणि मॉस्कोमध्ये त्यांनी भारताला शस्त्र पुरवठा प्रस्तावित वेळेच्या अगोदरच करावा यासाठी विनंतीही केली.

फ्रान्सने यापूर्वीच राफेल विमाने एका महिन्याच्या आत भारताला देणार असल्याचं सांगितलं आहे. याशिवाय फ्रान्स आपली एरियल रिफ्युलर्सही तैनात करणार आहे, जेणेकरुन फ्रान्समधून उड्डाण घेतल्यानंतर विमाने विना थांबा थेट भारतात पोहोचतील. भारतीय वैमानिकांना सध्या फ्रान्समध्ये एरियल रिफ्युलिंगसाठी विशेष प्रशिक्षण देण्यात येत आहे.

मित्र राष्ट्र करार झालेले शस्त्र वेळेच्या अगोदर देण्यासाठी तयार आहेत. फ्रान्सने आणखी एक राफेल लढाऊ विमान पुढच्या महिन्यात देण्याचं आश्वासन दिलं आहे, तर इस्रायलची सेवेत असलेली हवाई संरक्षण प्रणाली लवकरच मिळणं अपेक्षित आहे. अमेरिकेकडून आर्टिलरी पाठवली जाणार आहे, तर रशिया दारुगोळा आणि जवळपास ७ हजार ५०० कोटी रुपयांची शस्त्र पाठवणार आहे. दिल्लीत उच्चस्तरीय बैठका आणि द्वीपक्षीय चर्चा झाल्यानंतर ही आश्वासने मिळाली आहेत. कोणत्याही परिस्थितीला सामोरं जाण्यासाठी सैन्याला आर्थिक ताकदही प्रदान करण्यात आली आहे. एअर टू एअर हल्ल्यासाठी जगातील सर्वात शक्तीशाली लढाऊ विमानांपैकी एक असलेल्या राफेलची पहिली खेप भारताला २७ जुलैपर्यंत मिळणं अपेक्षित आहे.

Share this to: