नागरिकत्व दुरूस्ती कायद्याविरोधात काँग्रेसने बोलाविलेल्या बैठकीला शिवसेनेची दांडी

नवी दिल्ली, दि. १३ (पिंपरी चिंचवड टाइम्स) – नागरिकत्व दुरुस्ती कायद्याविरोधात विरोधकांचा आवाज बुलंद करण्यासाठी काँग्रेसच्या नेतृत्वाखाली दिल्लीत एका बैठकीचं आयोजन करण्यात आलं आहे. या बैठकीला बहुजन समाज पार्टीच्या नेत्या मायावती, तृणमूल काँग्रेसच्या नेत्या ममता बॅनर्जी आणि आपचे नेते अरविंद केजरीवाल यांनी उपस्थित राहणार नसल्याचं स्पष्ट केलेलं असतानाच शिवसेनेनेही बैठकीला जाणार नसल्याचं स्पष्ट केलं आहे. त्यामुळे नागरिकत्व दुरुस्ती कायद्याविरोधात विरोधी पक्षांची मोट बांधण्याच्या काँग्रेसच्या प्रयत्नाला खिळ बसली आहे.

नागरिकत्व दुरुस्ती कायदा आणि जेएनयूमधील हिंसाचाराच्या पार्श्वभूमीवर विरोधकांनी व्यापक जनआंदोलन उभं करण्यासाठी काँग्रेसने आज दिल्लीत विरोधकांची बैठक बोलावली होती. मात्र या बैठकीचं अधिकृत निमंत्रण नसल्याने बैठकीत सहभागी होणार नसल्याचं शिवसेनेने स्पष्ट केलं आहे. तर काँग्रेस आणि डाव्यांकडून सीएए विरोधातील आंदोलनात हिंसाचार केला जात असल्याचा आरोप करत पश्चिम बंगालच्या मुख्यमंत्री ममता बॅनर्जी यांनी या बैठकीला जाणार नसल्याचं स्पष्ट केलं आहे. सीएए आणि एनआरसी विरोधात आम्ही आमच्या बळावर लढा उभारू, असं सांगतानाच भारत बंदच्या काळात काँग्रेसने दुटप्पी भूमिका घेतल्याचा आरोपही बॅनर्जी यांनी केला होता. यावेळी त्यांनी काँग्रेसच्या बैठकीवर बहिष्कार टाकत असल्याचंही म्हटलं होतं.

ममता बॅनर्जींपाठोपाठ बसपा नेत्या मायावती यांनीही काँग्रेसवर जोरदार टीका करत बैठकीला जाणार नसल्याचं स्पष्ट केलं आहे. राजस्थानमध्ये बसपाने काँग्रेसला पाठिंबा दिलेला असतानाही काँग्रेसने बसपाच्या आमदाराला फोडून त्याला काँग्रेसमध्ये प्रवेश दिला. काँग्रेसने एकप्रकारे आमच्यासोबत विश्वासघात केला आहे. त्यामुळे काँग्रेसच्या नेतृत्वाखालील बैठकीला हजर राहणं हे राजस्थानमधील पक्ष कार्यकर्त्यांचं खच्चीकरण केल्यासारखं होईल. त्यामुळेच आम्ही या बैठकीत भाग घेणार नाही, असं ट्विट मायावती यांनी केलं आहे.

मात्र, दुसऱ्या एका ट्विटमध्ये मायावती यांनी बसपा सीएए आणि एनआरसी विरोधात असल्याचं म्हटलं आहे. केंद्र सरकारने देशात फूट पाडणारा हा असंवैधानिक कायदा मागे घ्यावा, असं आवाहन मायावती यांनी केलं आहे. आम्हाला या बैठकीची माहिती नाही. आम्हाला बैठकीबद्दल काहीही कळवण्यात आलेलं नाही. त्यामुळे बैठकीत सामिल होण्याचा प्रश्नच उद्भवत नसल्याचं आपचे नेते आणि राज्यसभा सदस्य संजय सिंह यांनी सांगितलं.

Share this to: