कोरोना लसीचा बुस्टर डोस कोणता घ्यायचा; केंद्र सरकारने दिले उत्तर…

नवी दिल्ली, दि. ६ (पिंपरी चिंचवड टाइम्स) – आरोग्य आणि अत्यावश्यक कर्मचारी तसेच सहव्याधी असलेल्या ६० वर्षांवरील नागरिकांना येत्या १० जानेवारीपासून कोरोना लसीची वर्धक मात्रा म्हणजेच बुस्टर डोस देण्यात येणार आहे. मात्र या बुस्टर डोसची लस पूर्वी घेतलेल्या दोन लसींच्याच कंपनीची असेल की अन्य कंपनीची लस घेऊ शकतो यासंदर्भातील संभ्रमावर केंद्राने उत्तर दिले आहे. बुस्टर डोस हा पूर्वी घेतलेल्या लसीचाच असेल असे केंद्राने स्पष्ट केले आहे. निती आयोगाचे (आरोग्य) सदस्य डॉ. व्ही. के. पॉल यांनी माहिती दिली आहे. म्हणजेच कोव्हॅक्सिन लस घेतलेल्यांना कोव्हॅक्सिनचाच बुस्टर डोस दिला जाईल तर कोव्हिशिल्ड लस घेतलेल्यांना याच लसीचा बुस्टर डोस देण्यात येणार आहे.

पंतप्रधान नरेंद्र मोदी यांनी १५ ते १८ वयोगटातील किशोरवयीन मुलांच्या लसीकरणाची घोषणा २५ डिसेंबर २०२१ रोजी केली होती. त्याचवेळी आरोग्य सेवेतील आणि आघाडीवरील कर्मचाऱ्यांबरोबरच ६० वर्षांवरील व्याधीग्रस्तांना वर्धक लसमात्रा (बूस्टर डोस) देण्याचेही मोदी यांनी जाहीर केले होते. येत्या जानेवारीपासून देशाच्या लसीकरण कार्यक्रमाचा विस्तार करून त्यात १५ ते १८ वयोगटातील मुलांचा समावेश करण्यात येईल. या किशोरवयीन मुलांच्या लसीकरणाचा प्रारंभ ३ जानेवारीपासून होईल, असे मोदी यांनी नमूद केले होते. या १५ ते १८ वयोगटातील लसीकरणाचा चांगला प्रतिसाद मिळताना दिसत आहे. याच वेळी पंतप्रधान मोदींनी आरोग्य सेवा आणि आघाडीवरील कर्मचाऱ्यांसह ६० वर्षांवरील व्याधीग्रस्तांना त्यांच्या डॉक्टरांच्या सल्ल्यानुसार १० जानेवारीपासून वर्धक लसमात्रा देण्यात येईल, असेही सांगितले होते.

देशात करोना आणि त्याच्या उत्परिवर्तित ओमायक्रॉन विषाणूचे रुग्ण वाढत असल्याच्या पार्श्वभूमीवर पंतप्रधान मोदी यांनी २५ डिसेंबर रोजी रात्री ९.४५ वाजता राष्ट्राला उद्देशून भाषण केले होते. त्यात त्यांनी ओमायक्रॉनच्या वेगवान संसर्गाबद्दल सतर्कतेचे आवाहन नागरिकांना केले होते. मोदी म्हणाले की जगातील अनेक देशांत ओमायक्रॉनची साथ पसरली असून आपण घाबरून न जाता सतर्क राहण्याची गरज आहे. कोरोनाची महासाथ अद्याप संपलेली नसल्याने आपल्याला आणखी खबरदारी घेणे आवश्यक आहे. देशाच्या, नागरिकांच्या सुरक्षिततेसाठी आम्ही निरंतर काम केले. तज्ञांच्या सल्ल्यानुसार लसीकरणाचे टप्पे आणि वयोगट ठरवून मोहीम राबवली. आपल्या लसीकरण मोहीमेला ११ महिने पूर्ण होत असताना आपण लसीकरणाची व्याप्ती वाढवत आहोत, असे मोदी यांनी नमूद केले होते. कोरोना संसर्गाचे गांभीर्य लक्षात घेऊन आजपर्यंत १४१ कोटी लसमात्रा देण्यात आल्या असून ९० टक्क्यांहून अधिक पात्र नागरिकांनी पहिली लसमात्रा घेतली आहे, अशी माहिती मोदी यांनी दिली होती. नव्या ओमायक्रॉन विषाणूच्या वाढत्या प्रादुर्भावामुळे घाबरून जाऊ नका, मास्क आणि वारंवार हात निर्जंतुक करा, असे आवाहन मोदी यांनी नागरिकांना केले होते.

Share this to: