कोविड केअर सेंटरमध्ये भरते आरएसएसची शाखा; रुग्णांना शिकविले जाते योग आणि प्राणायाम

मिर्झापूर, दि. ३० (पिंपरी चिंचवड टाइम्स) – उत्तर प्रदेशातील मिर्झापूर येथे येथे कोविड रुग्णालयातील आयसोलेशन वॉर्डमध्ये राष्ट्रीय स्वयंसेवक संघाची शाखा सुरू झाली आहे. या शाखेचा व्हिडिओ सध्या सोशल मीडियावर व्हायरल होत आहे. राष्ट्रीय स्वयंसेवक संघाच्या एका पदाधिकाऱ्याचा करोनाचा रिपोर्ट पॉझिटीव्ह आल्यानंतर आरोग्य विभागाच्या टीमने त्यांना शेम्फोर्ड स्कूलमध्ये बनवण्यात आलेल्या आयसोलेशन वॉर्डमध्ये दाखल केले होते. त्यानंतर दुसऱ्याच दिवशी या संघाच्या पदाधिकाऱ्याने आयसोलेशन वॉर्डात संघाचा वर्ग घेतला.

मिर्झापूरमधील शेम्फोर्ड शाळेत कोविड सेंटर बनवले गेले आहे. येथे सध्या आरएसएस पदाधिकारी करोनाची लागण झालेल्या रुग्णांना या शाखेच्या माध्यमातून योग, प्राणायाम इत्यादींद्वारे सकारात्मक ऊर्जा देण्याचे काम करत आहेत. या बरोबरच येथे संघाची प्रार्थना आणि चर्चा देखील केल्या जातात.

येथील रुग्ण सकाळी सहा वाजता वॉर्डात ध्वज फडकावून प्राणायम केल्यानंतर शाखेच्या इतर कार्यक्रमांमध्ये भाग घेतात. असे केल्याने करोनाची लागण झालेल्या रुग्णांचा मानसिक तणावही कमी होतो, आणि योग, प्रणायाममुळे शारीरिक शक्ती देखील वाढते, असा आरएसएसच्या पदाधिकाऱ्याचा दावा आहे.

येथे पोहोचल्यानंतर सर्व प्रथम आम्ही लोकांना शाखेसाठी तयार केले असे राष्ट्रीय स्वयंसेवक संघाचे प्रांत कार्यवाह सोहन श्रीमाली यांनी सांगितले. यानंतर दुसऱ्याच दिवशी पहाटे सहा वाजल्यापासून ते सात वाजेपर्यंत आयसोलेशन वॉर्डच्या हॉलमध्ये शाखा सुरू केली, असे श्रमाली म्हणाले.

अशा प्रयत्नांमुळे या कोविड सेंटरमधील आयसोलेशन वॉर्डातील सकाळचे वातावरण छान प्रसन्न होऊन जाते, असेही ते पुढे म्हणाले. या सेंटरमध्ये दररोज सकाळी आणि संध्याकाळी शाखा घेण्यात येते. या शाखेच्या कार्यक्रमात सुमारे ३५ लोक सहभागी होत आहेत, अशी माहितीही त्यांनी दिली.

Share this to: