कोरोना व्हायरस; या कारणांमुळे लहान मुलांना कोरोना आजाराचा कमी धोका!

हॉस्टन, दि. ९ (पिंपरी चिंचवड टाइम्स) – करोना विषाणूच्या संसर्गाने जगभरात हाहाकार माजवला आहे. जगभरातील जवळपास २०० देशांमध्ये करोनाचा संसर्ग पसरला आहे. एक कोटीहून अधिकजणांना करोनाची बाधा झाली असून यामध्ये लहान मुलांचे प्रमाण कमी आहे. लहान मुलांना करोनाची बाधा होण्याचे प्रमाण कमी असण्यामागील कारण संशोधकांना सापडले आहे.

लहान मुलांमधील फुफ्फुसाचे कार्य आणि रोगप्रतिकारक यंत्रणेच्या कार्यप्रणालीतील थोडा फरक असल्यामुळे मुलांना प्रौढांपेक्षा करोनाची बाधा कमी प्रमाणात झाली असल्याचे समोर आले आहे. अमेरिकेतील टेक्सास विद्यापीठातील आरोग्य विज्ञान केंद्रातील शास्त्रज्ञांनी याबाबत संशोधन केले आहे. शास्त्रज्ञांनी सांगितले की अमेरिकेतील लोकसंख्येपैकी २२ टक्के लोकसंख्या ही १८ वर्षांपर्यंतची आहेत परंतु कोविड -१९ आजारातील पहिल्या एक लाख ४९ हजार ८२ प्रकरणात यामध्ये केवळ १.७ टक्के रुग्ण या वयोगटातील आहेत.

अमेरिकन नियतकालिक ‘लंग सेल्युलर अॅण्ड मोल्युक्यूलर फिजियोलॉजी’मध्ये हे संशोधन प्रसिद्ध झाले आहे. संशोधकांनी म्हटले की, अँजियोटेन्सिन किंवा ‘एसीई २’ हे मानवांमध्ये आढळणारे एक रेणू घटक किशोरवयीन मुलांपेक्षा लहान मुलांमध्ये कमी प्रमाणात आढळतो. हे रेणू करोना विषाणू पेशींमध्ये पोहोचवण्यास मदत करतो. संशोधनात सहभागी असलेले मॅथ्यू हार्टिंग म्हणाले, ‘एसीई २’ हा मानवी शरीरात विषाणूच्या प्रवेशासाठी महत्वाचा आहे. वयानुसार मुलांमध्ये लहान मुलांमध्ये ही संख्या कमी आढळते. ‘ शास्त्रज्ञांचे म्हणणे आहे की लहान मुलांमधील रोग प्रतिकारशक्ती ही किशोरवयीन, तरुणांपेक्षा वेगळ्या पद्धतीने काम करते. त्यामुळे लहान मुलांमध्ये गंभीर आजाराचा धोका कमी होतो.

दरम्यान, जगभरात करोनाच्या संसर्गाचे थैमान सुरू आहे. करोनाबाधितांची संख्या एक कोटीहून अधिक झाली असून पाच लाखांहून अधिकजणांचा बळी गेला आहे. जगभरातील ८४ देशांमध्ये होणाऱ्या चाचण्या आणि करोनाबाधितांचा अभ्यास करून Massachusetts Institute of Technology (MIT)ने आपला अहवाल तयार केला आहे. या अहवालानुसार, करोनावर औषध न सापडल्यास, करोनावर नियंत्रण न मिळवल्यास भारतात फेब्रुवारी २०२१पासून दररोज पावणे तीन लाख नवीन करोनाबाधित रुग्ण आढळण्याचा धोका आहे.

Share this to: